నందమూరి అభిమానుల నిరీక్షణకు తెర: టికెట్ బుకింగ్స్ షురూ
Akhanda 2: నందమూరి నటసింహం బాలకృష్ణ, మాస్ డైరెక్టర్ బోయపాటి శ్రీను కాంబినేషన్లో వస్తున్న లేటెస్ట్ సెన్సేషన్ ‘అఖండ 2: తాండవం’. ఇప్పటికే విడుదలైన ట్రైలర్, పాటలు సినిమాపై అంచనాలను ఆకాశానికి ఎత్తేశాయి. ప్రపంచవ్యాప్తంగా డిసెంబర్ 12న ఈ చిత్రాన్ని విడుదల చేయడానికి నిర్మాతలు సన్నాహాలు పూర్తి చేశారు.
అయితే, సినిమా విడుదలకు కేవలం కొన్ని గంటల సమయం మాత్రమే ఉన్నప్పటికీ, ఆన్లైన్ బుకింగ్స్ పూర్తి స్థాయిలో తెరుచుకోకపోవడంతో అభిమానులు గత రెండు రోజులుగా తీవ్ర ఆందోళనకు గురయ్యారు. కానీ, ఎట్టకేలకు ఆ సస్పెన్స్ వీడింది. రెండు తెలుగు రాష్ట్రాల ప్రభుత్వాలు సినిమా టికెట్ రేట్ల పెంపునకు, స్పెషల్ షోలకు అనుమతి ఇస్తూ తాజాగా జీవోలు జారీ చేయడంతో అటు తెలంగాణ, ఇటు ఆంధ్రప్రదేశ్లో బుకింగ్స్ జోరుగా సాగుతున్నాయి.
Akhanda 2 – వాయిదా కారణంగా కొత్త జీవోల జారీ
వాస్తవానికి ఈ చిత్రాన్ని( Akhanda 2 ) మొదట డిసెంబర్ 5వ తేదీన విడుదల చేయాలని చిత్ర యూనిట్ భావించింది. ఆ తేదీకి అనుగుణంగానే ప్రభుత్వాల నుంచి అప్పట్లో అనుమతులు కూడా తెచ్చుకున్నారు. కానీ, కొన్ని అనివార్య కారణాల వల్ల సినిమా డిసెంబర్ 12కు వాయిదా పడింది. దీంతో పాత జీవోల గడువు ముగిసిపోవడం, కొత్త తేదీకి అనుగుణంగా మళ్లీ అనుమతులు తీసుకోవాల్సి రావడంతో బుకింగ్స్ ఓపెన్ కావడంలో జాప్యం జరిగింది. తాజాగా ఈ అడ్డంకులన్నీ తొలగిపోవడంతో అభిమానులు ఊపిరి పీల్చుకున్నారు.
Akhanda 2 – తెలంగాణలో రేట్ల పెంపు, MAAకు విరాళం
తెలంగాణ ప్రభుత్వం జారీ చేసిన తాజా ఉత్తర్వుల ప్రకారం, సినిమా విడుదలైన మొదటి మూడు రోజుల పాటు, అంటే డిసెంబర్ 12 నుంచి 14వ తేదీ వరకు టికెట్ రేట్లు పెంచుకునే వెసులుబాటు కల్పించారు. దీని ప్రకారం సింగిల్ స్క్రీన్ థియేటర్లలో రూ.50, మల్టీప్లెక్స్లలో రూ.100 చొప్పున (జీఎస్టీతో కలిపి) అదనంగా పెంచుకోవచ్చు. అంతేకాకుండా, డిసెంబర్ 11వ తేదీ రాత్రి 8 గంటల నుంచి ప్రీమియర్ షోలు వేసుకునేందుకు కూడా తెలంగాణ ప్రభుత్వం గ్రీన్ సిగ్నల్ ఇచ్చింది.
ఈ ప్రీమియర్ షోలకు గరిష్టంగా రూ.600 వరకు (జీఎస్టీతో కలిపి) టికెట్ ధరను పెంచుకునే అవకాశం కల్పించారు. అయితే, ఇక్కడ ఒక ఆసక్తికరమైన విషయాన్ని జీవోలో ప్రస్తావించారు. తెలంగాణలో పెంచిన ఈ అదనపు టికెట్ రేట్ల ద్వారా వచ్చే ఆదాయంలో 20 శాతాన్ని ‘మూవీ ఆర్టిస్ట్స్ వెల్ఫేర్ అసోసియేషన్’ (MAA) ఖాతాకు జమ చేయాలని ప్రభుత్వం సూచించింది. పేద కళాకారుల సంక్షేమం కోసం తీసుకున్న ఈ నిర్ణయం నిజంగా హర్షణీయం అని చెప్పాలి.
Akhanda 2 – ఆంధ్రప్రదేశ్లో పది రోజుల పాటు అధిక ధరలు
మరోవైపు ఆంధ్రప్రదేశ్ ప్రభుత్వం కూడా బాలయ్య సినిమాకు భారీ ఊరటనిచ్చింది. తెలంగాణతో పోలిస్తే ఏపీలో ఎక్కువ రోజుల పాటు రేట్ల పెంపునకు అనుమతి లభించింది. ఏపీలో సినిమా విడుదలైన రోజు నుంచి ఏకంగా పది రోజుల పాటు పెంచిన ధరలు అమల్లో ఉంటాయి. అక్కడ కూడా సింగిల్ స్క్రీన్స్లో రూ.75, మల్టీప్లెక్స్లలో రూ.100 చొప్పున టికెట్ రేట్లు పెంచుకునేందుకు ప్రభుత్వం అనుమతి ఇచ్చింది.
అలాగే డిసెంబర్ 11వ తేదీ రాత్రి వేసే ప్రీమియర్ షోలకు రూ.600 వరకు టికెట్ ధర నిర్ణయించుకునే స్వేచ్ఛను నిర్మాతలకు కల్పించింది. మొత్తానికి రెండు రాష్ట్రాల నుంచి సానుకూల స్పందన రావడంతో డిస్ట్రిబ్యూటర్లు, థియేటర్ యజమానులు ఆనందం వ్యక్తం చేస్తున్నారు.
ఇప్పటికే చాలా చోట్ల టికెట్లు హాట్ కేకుల్లా అమ్ముడవుతున్నాయి. అఖండ మొదటి భాగం బాక్సాఫీస్ వద్ద ఏ రేంజ్లో విధ్వంసం సృష్టించిందో మనందరికీ తెలిసిందే. ఇప్పుడు అంతకు మించిన అంచనాలతో వస్తున్న ‘అఖండ 2’, టికెట్ రేట్ల పెంపుతో వసూళ్ల పరంగా కొత్త రికార్డులు సృష్టించడం ఖాయంగా కనిపిస్తోంది. డిసెంబర్ 12న థియేటర్ల వద్ద బాలయ్య అభిమానుల కోలాహలం, జై బాలయ్య నినాదాలతో మోత మోగడం ఖాయం.
